আজি মৰিগাঁৱত বিজেপিৰ কাৰ্যনিৰ্বাহক সভাত অংশগ্ৰহণৰ বাবে জিলাখনত উপস্থিত হয় মুখ্যমন্ত্ৰী ড০ হিমন্ত বিশ্ব শৰ্মা। উক্ত ভ্ৰমণৰ সময়ছোৱাত মৰিগাঁৱৰ তিলোত্তমা বৰুৱাই বৃন্দাবনী বস্ত্ৰৰ আৰ্হিত বৈ উলিওৱা এখনি বস্ত্ৰ, গীতা-ভাগৱতৰ পুথি আৰু ভগৱান শ্ৰীকৃষ্ণৰ এখন প্ৰতিচ্ছবি প্ৰদান কৰে মুখ্যমন্ত্ৰী শৰ্মাক। এই উপহাৰ লাভ কৰি আহ্লাদিত হয় মুখ্যমন্ত্ৰীগৰাকী। তিলোত্তমা বৰুৱাই প্ৰদান কৰা অকৃত্ৰিম মৰম আৰু স্নেহাশিসৰ বাবে তেখেতৰ ওচৰত চিৰকৃতজ্ঞ হৈ ৰোৱাৰ কথা প্ৰকাশ কৰে মুখ্যমন্ত্ৰীগৰাকীয়ে। তদুপৰি ভাৰ্গৱজ্যোতি নাথে অংকন কৰা মুখ্যমন্ত্ৰীগৰাকীৰ প্ৰতিচ্ছবি এখন উপহাৰস্বৰূপে লাভ কৰি আপ্লুত হয় মুখ্যমন্ত্ৰী শৰ্মা। শিক্ষাৰ্থীগৰাকীৰ কলা নৈপুণ্যই মুখ্যমন্ত্ৰী গৰাকীক প্ৰভাৱিত কৰাৰ লগতে তেওঁৰ উজ্জ্বল ভৱিষ্যৎ কামনা কৰি আন্তৰিক শুভেচ্ছা জ্ঞাপন কৰে মুখ্যমন্ত্ৰীগৰাকীয়ে।